Mazkur roliklar O‘zbekistondagi Islom sivilizatsiyasi markazi tashabbusi bilan amalga oshirilayotgan keng ko‘lamli media-loyihaning muhim qismi bo‘lib, unda Sharq uyg‘onish davrining buyuk mutafakkirlari va olimlari merosi xalqaro auditoriyaga zamonaviy, ta’sirchan vizual echimlar orqali taqdim etilmoqda. Videoroliklar jahon tomoshabinlarini islom sivilizatsiyasi bag‘rida kamol topgan ilm-fan, tafakkur va ma’naviyat an’analari bilan tanishtirishga qaratilgan.
Loyihada ser Ben Kingsley ishtirok etib, u Xorazmiy, Beruniy, Ibn Sino, Mirzo Ulug‘bek, Alisher Navoiy va Amir Temur kabi buyuk siymolar hayoti, ilmiy merosi hamda ularning jahon sivilizatsiyasi taraqqiyotiga qo‘shgan beqiyos hissasi haqida hikoya qiladi.
“Ma’rifat aks-sadosi” loyihasi doirasida tarix, madaniyat va fan rivojiga muhim ta’sir ko‘rsatgan allomalar hayotiga bag‘ishlangan o‘ndan ortiq qisqa metrajli hujjatli filmlar ishlab chiqish rejalashtirilgan. Ushbu filmlar aynan xalqaro tomoshabinlar uchun mo‘ljallangan bo‘lib, dunyoning yetakchi media-platformalari orqali namoyish etiladi.
Loyiha O‘zbekiston Respublikasi Prezidenti Shavkat Mirziyoyev tashabbusi doirasida mamlakatimizning boy ilmiy-ma’naviy merosini keng targ‘ib etish, xalqaro madaniy muloqotni mustahkamlash hamda O‘zbekistoni qadimiy sivilizatsiyalar beshigi, fan va ma’rifat markazi sifatida dunyoga tanitishga xizmat qiladi.
