Prezident Shavkat Mirziyoyevga aholini va qishloq xo‘jaligini ro‘yxatga olish tadbirlarini tashkil etish hamda o‘tkazish bo‘yicha amalga oshirilayotgan ishlar yuzasidan axborot berildi.
Ushbu tadbir mamlakatimizda demografik jarayonlar, mehnat resurslari, ijtimoiy infratuzilma va hududiy rivojlanishni ilmiy asosda rejalashtirishda muhim ahamiyat kasb etadi. Ro‘yxatga olish jarayonlari xalqaro standartlar asosida, zamonaviy raqamli echimlardan foydalangan holda amalga oshirilmoqda.
Ro‘yxatga olish joriy yilning 15 yanvaridan 28 fevraligacha ikki bosqichda o‘tkazilmoqda. 15-31 yanvar kunlari davom etadigan birinchi bosqichda fuqarolar maxsus axborot tizimi orqali onlayn ro‘yxatdan o‘tishlari mumkin. Ikkinchi bosqichda esa 4-28 fevral kunlari “mahalla yettilig”i xodimlari tomonidan uyma-uy yurib, savolnomala r planchet qurilmalari orqali to‘ldiriladi.
Aholini ro‘yxatga olish jarayonlari census.stat.uz portalida amalga oshirilib, OneID tizimi orqali identifikatsiya qilinishi belgilangan. Barcha ma’lumotlar geoaxborot tizimi asosida monitorinq qilinmoqda. Shu maqsadda respublika bo‘yicha 7,6 milliondan ortiq xonadon va turar joylarning geomanzillari shakllantirildi, jarayonlarni real vaqt rejimida kuzatib borish imkoniyatini beruvchi maxsus monitoriq d ashbordlari ishlab chiqildi.
Fuqarolar tomonidan taqdim etiladigan barcha ma’lumotlar qonunchilik talablariga muvofiq himoya qilinadi, shaxsiy ma’lumotlar maxfiy saqlanadi va faqat statistik maqsadlarda qo‘llaniladi.
Ro‘yxatga olish tadbirlarini yuqori saviyada o‘tkazish uchun 14 ta hududiy va 208 ta tuman va shahar shtablari tashkil etildi. 60 ming nafarga yaqin ro‘yxatga oluvchi xodimlar tayyorlandi. Jumladan, 54 ming nafar “mahalla yettilig”i vakillari, 2,6 ming zaxira xodimlar hamda 4 ming nafar hududiy shtab a’zolari jarayonga jalb etildi. Shuningdek, vazirlik va idoralardan 480 nafar trener, oliy ta’lim muassasalaridan 3200 nafar volonter o‘quvdan o‘tkazildi.
Aholini xabardor qilish va targ‘ibot ishlariga ham alohida e’tibor qaratilmoqda. Jumladan, 110 ta targ‘ibot videoroligi, 600 ta televizion lavha tayyorlandi, ijtimoiy tarmoqda 6,3 mingta, aholi gavjum joylar va jamoat transportlarida 23 mingdan ziyod axborot materiallari joylashtirildi.
Qayd etilganidek, bugungi kungacha maxsus portal orqali 2,48 million xonadon hamda 31 mingta fermer xo‘jaliklari va qishloq xo‘jaligi korxonalari ro‘yxatga olindi.
Davlatimiz rahbari aholi va qishloq xo‘jaligini ro‘yxatga olish tadbirlarini sifatli o‘tkazish, ma’lumotlarning ishonchliligini ta’minlash va ulardan qaror qabul qilish jarayonlarida keng foydalanish muhimligini ta’kidladi.
