Songgi kunlarda ijtimoiy tarmoqlarda Rossiyada OMON xodimlari tomonidan O‘zbekiston fuqarosi o‘ldirilgani haqidagi xabarlar keng muhokamaga sabab bo‘ldi. Mazkur holat yuzasidan O‘zbekiston Tashqi ishlar vazirligi rasmiy bayonot berib, voqea tafsilotlari o‘rganilayotganini ma’lum qildi.
Holatga “Milliy tiklanish” demokratik partiyasi raisi Alisher Qodirov ham munosabat bildirdi. U ijtimoiy tarmoqlardagi sahifasida Rossiyadagi vaziyat Markaziy Osiyo fuqarolari uchun tobora xavfli tus olayotganini ta’kidladi.
“Ishoning, vaziyat oy sayin faqat yomonlashadi. Rossiya maxsus xizmatlari Markaziy Osiyoliklarni kelajakda yuz berishi mumkin bo‘lgan notinchliklarning faol ishtirokchisi sifatida ko‘rmoqda. Shu sababli ulardan keladigan mehnat foydasidan allaqachon voz kechilgan”, — deb yozdi Qodirov.
Shuningdek, u O‘zbekiston fuqarolariga murojaat qilib, Rossiyaga borishdan tiyilish va imkon qadar tezroq u yerdan qaytishni tavsiya qildi.
“Aqlingizni ishlating, Rossiyadan tezroq keting. Hech qanday daromad ota-onangiz va farzandlaringizning ko‘z yoshiga arzimaydi”, — deya yozadi u.
O‘zbekiston Tashqi ishlar vazirligi bergan rasmiy izohda Rossiyaning Xabarovsk shahrida O‘zbekiston fuqarosining vafoti bilan bog‘liq holat mamlakatning Vladivostokdagi Bosh konsulxonasi va Migratsiya agentligi tomonidan nazoratga olingani bildirildi.
“Bosh konsulxona marhumning yaqinlari bilan doimiy aloqada bo‘lib, ularga zarur konsullik va amaliy yordam ko‘rsatmoqda. Fuqaroning jasadini Vatanga qaytarish bo‘yicha tegishli ishlar olib borilmoqda”, — deyiladi vazirlik axborotida.
Shuningdek, hodisa yuzasidan O‘zbekiston Bosh konsulxonasi tomonidan Xabarovsk o‘lkasi prokuraturasi, tergov boshqarmasi hamda Rossiya TIVning hududiy vakolatxonalariga rasmiy notalar yuborilib, holatni har tomonlama, xolis va qonuniy tartibda o‘rganish so‘ralgani qayd etildi.
TIV bayonotida O‘zbekiston diplomatlari xorijda bo‘lib turgan har bir fuqaroning huquq va manfaatlarini himoya qilishni ustuvor vazifa deb bilishi alohida ta’kidlangan.
