Yangi infografikaga ko‘ra, qoramol go‘shtini eng ko‘p iste’mol qiladigan davlat Argentina bo‘lib, bir kishi o‘rtacha 46 kg go‘sht iste’mol qiladi. Keyingilar — Zimbabve (44.4 kg), AQSh (38 kg), Isroil (36.1 kg) va Braziliya (34.6 kg). Argentinaning yuqori ko‘rsatkichi mamlakat barbekyu madaniyati — asado bilan bog‘liq.
Cho‘chqa go‘shti iste’moli bo‘yicha Xorvatiya (57.4 kg) yetakchi. Uning ortidan Ispaniya (56.5 kg), Chernogoriya (53.5 kg), Gonkong (52.6 kg) va Polsha (51.6 kg) keladi. Bu mamalakatlarda cho‘chqa go‘shti ko‘plab an’anaviy taomlarning asosiy qismi hisoblanadi.
Tovuq go‘shti eng ko‘p iste’mol qilinadigan davlatlar Sent-Vinsent va Grenadinlar (94.1 kg), Tonga (90.6 kg), Marshall orollari (74.8 kg), Samoa (74.8 kg) va Isroil (70.8 kg)dan iborat. To‘rt orol davlatida tovuqchilik cheklangan resurslar sharoitida asosiy protein manbai sifatida shakllangan.
Qo‘y va echki go‘shti bo‘yicha esa Mongoliya mutlaq yetakchi — jon boshiga 68.5 kg. Bahrayn (23.4 kg), Yangi Kaledoniya (21.9 kg), Turkmaniston (20.3 kg) va Chad (19 kg) keyingi o‘rinlarda. Mongoliadagi yuqori iste’mol ko‘chmanchi chorvachilik an’analari bilan izohlanadi.
