Yaponiya bosh vaziri Sanae Takaichi mamlakat hududida AQSH yadroviy qurollarini joylashtirish borasida ochiq pozitsiyani bildirdi. Unga ko‘ra, Tokio va Vashington o‘rtasidagi xavfsizlik hamkorligi tobora muhim tus olayotgan bir paytda bu masalani muhokama qilish vaqti yetgan, deya yozmoqda "Zamon.uz".
Mamlakatda 1960 yillardan buyon amal qilib kelayotgan “uch yadroviy tamoyil” — yadro quroliga ega bo‘lmaslik, ishlab chiqarmaslik va Yaponiya hududiga kiritmaslik — Yaponiyaning asosiy yadro siyosati sanaladi. Takaichi fikricha, aynan uchinchi tamoyil — yadroviy vositalarni kiritmaslik — AQShning Yaponiyani himoya qilish borasidagi imkoniyatlarini cheklashi mumkin.
Rasmiy Tokio, xususan, AQSh harbiy bazalari va yapon portlariga kiruvchi kemalarda yadro qurolini joylashtirish taqiqlanishi kuchayib borayotgan mintaqaviy tahdidlarga javob qaytarishni qiyinlashtirayotganini ta’kidlamoqda. Shu bois, bosh vazir bunday cheklovlar milliy xavfsizlik nuqtai nazaridan qayta ko‘rib chiqilishi lozimligini qayd etdi.
