AQSh prezidenti Donald Trump Isroil prezidenti Isaaq Gertsog nomiga maktub yollab, bosh vazir Benyamin Netanyaxuga nisbatan olib borilayotgan korruptsiya tergovini to‘xtatish va uni to‘liq kechirishga chaqirdi. Bu haqda Zamon.uz nashri xabar berdi.
Trump maktubida Netanyaxuni “urush davridagi dadil va hal qiluvchi bosh vazir” deb atab, hozirda u Isroilni tinchlik sari yetaklayotganini ta’kidladi. “Men sizdan Benyamin Netanyaxuni to‘liq kechirishingizni so‘rayman”, — deb yozgan Trump, shu bilan birga Isroil sud tizimining mustaqilligiga hurmatini bildirgan, biroq Netanyaxuga qarshi ishni “siyosiy va asossiz ta’qib” deb atagan.
Shuningdek, Trump Yaqin Sharqdagi muammolarni hal etishda AQSh vositasida erishilgan yutuqlarni eslab, “Endi Bibiga ruxsat berish, Isroilni kechirish va bu urushni yakunlab, xalqni birlashtirish vaqti keldi”, — deya ta’kidlagan.
Isroil prezidenti Isaaq Gertsog bunga javoban Trumpga hurmat va minnatdorchilik bildirgan holda, “Afv etish uchun belgilangan tartibda ayblanuvchining o‘zi yoki yaqinlari tomonidan rasmiy ariza topshirilishi zarur. Netanyaxu bunday murojaat qilmagan”, — deb javob qaytardi.
The Jerusalem Post’ning ma’lumotiga ko‘ra, amaldagi qonunlarga binoan prezident afvni faqat sud boshlanishidan oldin yoki hukm chiqarilgandan so‘ng berishi mumkin, hozir esa ish bu bosqichlarning hech birida emas.
Ma’lumot uchun, Benyamin Netanyaxuga nisbatan tergov 2016 yildan beri davom etmoqda. 2019 yilda u uchta alohida jinoyat ishi bo‘yicha ayblangan. Unga nisbatan qo‘yilgan ayblovlar orasida korruptsiya, ommaaviy axborot vositalariga ta’sir o‘tkazish va qimmatbaho sovg‘alarni qabul qilish holatlari bor. Prokuratura buni manfaatlar to‘qnashuvi deb baholagan bo‘lsa, Netanyaxu himoyachilari bu ayblovlarni asossiz, siyosiy bosim natijasi sifatida ko‘rmoqda.
Isroil jamoatchiligi orasida ushbu jarayon bo‘yicha keskin fikrlar mavjud — ayrimlar bu ish siyosiy tus olganini aytib, boshqalari “qonun hamma uchun bir hil bo‘lishi kerak” degan pozitsiyada turibdi.
