Ijtimoiy tarmoqlarda "Bo'zsuv" kanaliga rangli oqova suvlari oqizilyapti, degan videolar tarqaldi. Holat yuzasidan "O'zsuvta'minot" AJ rasmiy izoh berdi.
Ma'lum qilinishicha, Toshkent shahridan chiqayotgan oqova suvlarni biologik usulda tozalovchi 3 ta inshoot mavjud. Ular aholi tomonidan kelayotgan maishiy suvlar uchun mo'ljallangan bo'lib, ishlab chiqarishdagi kimyoviy chiqindilarni tozalash uchun moslanmagan.
"Aslida har bir ishlab chiqaruvchi korxonada kimyoviy tashlamalarni filtrlaydigan lokal inshoot bo'lishi lozim. Biroq, ularni ekspluatatsiya qilish qimmatga tushgani bois, ba'zi korxonalar oqova suvlarni to'g'ridan to'g'ri kanalizatsiyaga oqizib yubormoqda", — deyiladi xabarda.
Rasmiy ma'lumotga ko'ra, kanalga tushayotgan rangli suvlar asosan tekstil korxonalari chiqindilari hisoblanadi. "O'zsuvta'minot" barcha ishlab chiqaruvchilarni bu kabi xatti-harakatlardan voz kechishga va tabiat hamda jamiyat me'yorlariga rioya qilishga chaqirdi.
