Joriy yilning 16 sentyabr kuni Rossiyaning Sankt-Peterburg shahrida 23 yoshli o‘zbekistonlik ishchi qurilish maydonida halok bo‘ldi. Bu haqda Rossiyaning Shimoli-g‘arbiy mintaqalararo mehnat inspektsiyasi matbuot xizmati xabar berdi.
Bildirilishicha, Dobrolyubov prospektida Rossiya Oliy sudi va Oliy sud huzuridagi sud departamenti binosini qurish jarayonida 23 yoshli o‘zbekistonlik ishchi qurilish “lesa”da ishlayotganda 15 metr balandlikdan qulab tushib, voqea joyida vafot etgan. Aniqlanishicha, halok bo‘lgan ishchi va qurilish kompaniyasi o‘rtasida rasmiy mehnat hujjatlari mavjud bo‘lmagan.
Shimoli-g‘arbiy mintaqalararo mehnat inspektsiyasi rahbari o‘rinbosari Olga Kazanskayaning so‘zlariga ko‘ra, hodisaning ehtimoliy sabablari ishchining shaxsiy himoya vositalaridan foydalanmagan, jamoada himoya vositalarining yo‘qligi va balandlikda ishlarni qoniqarsiz tashkil etish bo‘lgan.
