AQSH Davlat kotibi Marko Rubio Isroil Bosh vaziri Binyamin Netanyahu bilan uchrashuvda Gazodagi harbiy amaliyotlarga Vashingtonning yondashuvini bayon qildi.
Unga ko‘ra, Trump ma’muriyati bu hujumlarni qo‘llab-quvvatlaydi, ammo ular uzoqqa cho‘zilmasligi kerak.
15 sentyabr kuni bo‘lib o‘tgan uchrashuvda AQSH Davlat kotibi Marko Rubio Netanyahuga Trump ma’muriyati Isroilning quruqlikdagi harbiy operatsiyasini qo‘llab-quvvatlashini bildirgan. “Axios” nashriining yozishicha, AQSH hujum tezkor bo‘lishi tarafdori.
Rubio bilan birga bo‘lgan amerikalik rasmiylardan biri: “Bu Trumpning urushi emas, bu Netanyahuning urushi. Barcha oqibatlar uchun u javobgar bo‘ladi”, — degan.
Isroil armiyasi so‘nggi haftalarda Gazodagi hujumlarni kuchaytirgan. Shaharga tanklar kiritilgan, aholi esa janubga ko‘chishga chaqirilgan. Ma’lumotlarga ko‘ra, 1 million aholining 300 mingga yaqini Gazoni tark etgan.
Isroil armiyasi faqat 20 daqiqada 37 ta zarba bergan, ulardan ayrimlari jangovar vertolyotlar orqali amalga oshirilgan. Falastinlik rasmiylar Gazoda og‘ir havo hujumlari haqida “Al Jazeera”ga xabar bergan.
Eslatib o‘tamiz, Rubio Isroilga Qatardagi HAMAS qorgohiga berilgan zarbadan so‘ng safar qilgan va bu hujumdan Oq uy norozi ekanini bildirgan edi.
