Namangan, Qashqadaryo hamda Toshkent shahrida ish yurituvchi mansabdorlar pora bilan ushlandi. Bu haqda Davlat xavfsizlik xizmatining matbuot xizmati Darakchi.uz’ga ma’lum qildi.
Qayd etilishicha, dastlabki holat Namangan viloyatida kuzatilgan. Hududda Qurilish va uy-joy kommunal xo‘jaligi sohasida nazorat qilish inspeksiyasi bosh mutaxassisi sud tizimidagi tanishlari orqali joriy yilning yanvar oyida 8 yil muddatga ozodlikdan mahrum qilingan mahkumning ishini sudda qayta ko‘rib chiqish va ozodlikdan mahrum qilish bilan bog‘liq bo‘lmagan jazoni tayinlash evaziga 30 ming AQSH dollari talab qilgan.
“Mansabdor shaxs so‘ralgan pulning 10 ming AQSH dollarini olgan vaqtida ashyoviy dalillar bilan ushlangan. Keyin ma’lum qilinishicha, mazkur mutaxassis firibgarlik bilan bog‘liq jinoyati uchun muqaddam bir necha marotaba sudlangan”, — deyiladi xabarda.
Namangandan uzoqlashmaymiz. Viloyatda o‘tkazilgan yana bir tezkor tadbirda, mol-mulklarni baholash faoliyati bilan shug‘ullanuvchi MCHJ rahbari soliq organlaridagi mansabdor tanishlari orqali tadbirkorga tegishli bo‘lgan MCHJning 783 mln so‘mlik soliq qarzdorligini 141 mln so‘mgacha kamaytirib berish evaziga 4400 AQSH dollari olgan vaqtida jinoyat ustida qo‘lga tushgan.
Shuningdek, tezkor tadbir davom ettirilib, mansabdor tanishi hisoblangan Namangan viloyati soliq boshqarmasi sho‘ba boshlig‘i ham 4400 AQSH dollarini pora sifatida olgan vaqtida ushlangan.
Keyingi holat poytaxt Toshkentning Mirobod tumanida kuzatilgan. Tuman hokimligi Ijtimoiy moslashtirish markazi rahbari o‘z xizmat mavqeidan foydalanib, fuqaroligi bo‘lmagan shaxsga fuqarolik pasportini rasmiylashtirish hamda doimiy ro‘yxatga qo‘ydirib berish evaziga 1200 AQSH dollari olgan vaqtida qo‘lga tushgan.
Yana bir holat Qashqadaryo viloyatida kuzatilgan. Qonunbuzilish holatida, Bosh prokuratura huzuridagi Majburiy ijro byurosi Qarshi shahar bo‘limi davlat ijrochisi o‘z ish yurituvida bo‘lgan, javobgar fuqaroning qariyb 70 mln so‘mlik qarzdorligini undirish uchun uning avtotransport vositasiga qo‘yilgan taqiqni yechib berish evaziga 1000 AQSH dollari talab qilgan.
O‘tkazilgan tezkor tadbir natijasida, davlat ijrochisi talab qilingan pul mablag‘ini Qarshi tumanidagi fermer xo‘jalik rahbari vositachiligida pora sifatida olgan vaqtida ushlangan.
Hozirda ushbu shaxslarga nisbatan jinoyat ishi qo‘zg‘atilib, tergov harakatlari olib borilmoqda.
