AQSHning Erondagi virtual elchixonasi Amerika fuqarolarini zudlik bilan mamlakatni tark etishga chaqirdi. Tegishli xabarnoma diplomatik vakolatxona veb-saytida joylashtirilgan.
"AQSH fuqarolariga Eronga tashrif buyurmaslik qat’iy tavsiya etiladi. Allaqachon mamlakatda bo‘lganlar zudlik bilan chiqib ketishlari kerak. Agar ular ketish imkoniyatiga ega bo‘lmasa, uzoq vaqt yashirinib yurishga tayyor turishlari kerak", deyiladi xabarda.
Xabarda AQSH Eron bilan diplomatik va konsullik aloqalarini saqlab qolmasligi, Shveysariya Vashington manfaatlarini himoya qilishi eslatib o‘tilgan.
AQSH fuqarolariga Eronni Ozarbayjon, Armaniston yoki Turkiya bilan chegara orqali tark etish imkoniyatini ko‘rib chiqish tavsiya etiladi.
"Ozarbayjonning quruqlikdagi chegaralari yopiq bo‘lsa-da, amerikaliklar 15 iyun kuni maxsus ruxsatnoma bilan Astara nazorat-o‘tkazish punktidan o‘tishlari mumkin bo‘ladi," deyiladi xabarda.
Chegaraga borishdan oldin Ozarbayjon rasmiylaridan tegishli ruxsat olish kerak. Uni ro‘yxatdan o‘tkazish AQSHning Bokudagi elchixonasi tomonidan tashkil etilishi kerak.
