Avvalroq, ijtimoiy tarmoqlarda Umra amalini bajarish uchun Makka va Madina shaharlariga kelgan va Vatanga qaytish bilan bog`liq muayyan qiyinchiliklarga duch kelgan o`zbekistonlik ziyoratchilar haqida videolar tarqalgan edi. Shundan so`ng, Diniy qo`mita fuqarolarni olib kelish bo`yicha choralar ko`rilayotganini ma`lum qildi. Shuningdek, Turizm qo`mitasi “Panorama airways” tomonidan parvozlarning kechikishi tufayli fuqarolarning "Umra" safaridan qayta olmayotganligi yuzasidan rasmiy munosabat bildirib, moddiy va ma`naviy zarar undirib berilishini ma`lum qildi.
Ayni paytda Bosh prokuratura holat bo`yicha rasmiy bayonot e`lon qildi.
Ma`lum qilinishicha, Transport prokuraturasi tomonidan o`zbekistonliklarni Umra safaridan qaytarish choralari ko`rmagan hamda boshqa jiddiy qonunbuzilish holatlariga yo`l qo`ygan xususiy avikompaniya mansabdor shaxslariga nisbatan qo`zg`atilgan jinoyat ishi yuzasidan tergov harakatlari olib borilmoqda.
Jinoyat ishi doirasida 1 nafar shaxsga nisbatan “qamoqqa olish” ehtiyot chorasi qo`llanilgan.
"Ish bo`yicha haqiqatni aniqlashga to`sqinlik qilish holatlarining oldini olish maqsadida boshqa tafsilotlar oshkor qilinmaydi", - deyiladi xabarda.
