Ijtimoiy tarmoqlarda Oliy ta`lim muassasalarining magistraturasiga hujjat topshirishda turk tili bo`yicha ayrim sertifikatlarning qabul qilinmayotgani borasida murojaatlar taqaldi.
Holat yuzasidan Oliy ta`lim, fan va innovasiyalar vazirligi quyidagilarni ma`lum qildi.
Vazirlikning 2023 yil 23 martdagi 65-son buyrug`i bilan tasdiqlangan ro`yxatda aks ettirilmagan, ammo 2022 yil 30 iyundagi 220-son buyrug`i bilan tasdiqlangan ro`yxatdagi 2023 yil 31 martgacha olingan hamda muddati o`tmagan milliy yoki unga mos darajadagi xalqaro sertifikatlar 2023/2024-o`quv yili qabulida oliy ta`lim muassasalarining magistratura mutaxassisliklaridagi tanlovda ishtirok etishi uchun inobatga olinadi.
So`nggi kunlarda tanlovda ishtirok etish uchun magistr.edu.uz platformasi orqali kiritilgan milliy yoki unga mos darajadagi xalqaro sertifikatlar tegishli rasmiy saytlar orqali tekshirilganda, ular orasida turk tilini bilishni tasdiqlovchi deya taqdim etilgan ayrim hujjatlar til bilish darajasini tasdiqlovchi sertifikatlar emas, balki ayrim o`quv markazlari tomonidan berilgan til kurslarida o`qiganligini tasdiqlovchi sertifikatlar bo`lib chiqmoqda. Shu bois, belgilangan talabga javob bermagan arizalarga rad javobi berilgan" deyiladi xabarda.
Ma`lumot uchun, abiturientlar tomonidan taqdim etilgan TYS (Türkçe Yeterlik Sınavı) sertifikati http://belgesorgula.yee.org.tr/ platformasi orqali tekshiriladi. Tekshiruv natijasida tasdiqlanmagan sertifikatlar inobatga olinmaydi.
Shu o`rinda abiturientlar olayotgan sertifikatlarini tegishli rasmiy saytlardan tekshirib ko`rishlari tavsiya etiladi.
