Shu yil 15 iyulda “Uzbekistan Airways” aviakompaniyasi Misr hukumati tomonidan mamlakatimizga insonparvarlik yordam sifatida ajratilgan “S” gepatitiga qarshi “Daklatasvir” dori vositasining o`ninchi qismini Sharm ash-Shayxdan Toshkentga etkazib berdi.
Umumiy hajmi 114 qutida 3 ming donadan ortiq “Daclatasvir-60 mg” dori vositalari O`zbekiston Sog`liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlarga taqsimlanadi, deb xabar beradi “Dunyo” AA.
Qayd etish joizki, Misr gepatit “V” va “S” viruslariga qarshi kurashda dunyo miqyosida sezilarli muvaffaqiyatlarga erishgan.
Misr Sog`liqni saqlash vazirligi ma`lumotiga ko`ra, mamlakat aholisi ushbu kasallikdan butunlay forig` bo`lgan.
Mutaxassislarning aytishicha, Misr hukumati mazkur yutuqlarga erishish uchun «100 million sog`lom hayot» milliy dasturni ishlab chiqib, uni muvaffaqiyatli amalga oshiryapti. Bunda asosiy e`tibor dunyoning mashhur farmasevtika kompaniyalari bilan yaqindan hamkorlik aloqalarini o`rnatish va kengaytirishga qaratilgan.
