Kimlarga samolyotda uchish mumkin emas?

Camolyot — tezkor va qulay transport vositasi. Ammo undan foydalanish uchun barchaning ham salomatlik ko`rsatkichlari mos kelavermaydi. 

Jahon sog`liqni saqlash tashkiloti salomatligi tufayli havo layneri bortiga chiqishiga ruxsat etilmaydigan yo`lovchilar ro`yxatini e`lon qildi.

“Aviakompaniyalar og`ir ahvoldagi yoki parvoz chog`ida sog`lig`i yomonlashishi mumkin bo`lgan ba`zi yo`lovchilarni samolyotga chiqarishdan bosh tortish huquqiga ega”, — deyiladi JSST hujjatida.

Ular quyidagilar: 

- tug`ilganiga 48 soat to`lmagan (yoki muddatidan avval dunyoga kelgan) chaqaloqlar;

- homiladorlikning 36-haftasi yoki undan ortiq davrida bo`lgan ayollar (ko`p homiladorlik uchun bu ko`rsatkich 32 haftaga teng)

- stenokardiya va ko`krak qafasidagi og`riq, yuqumli kasalliklar, yurak-qon tomir tizimi xastaliklariga chalinganlar;

- yaqinda infarkt yoki insultni boshdan kechirganlar;

- tanada havo yoki gaz to`planishi mumkin bo`lgan jarohatlari bor va yaqinda oshqozon, ichak, ko`z, yuz yoki bosh miya operasiyalarini o`tkazganlar;

- nafas olish tizimi bilan bog`liq o`tkir va uzoq muddatli xastaliklardan aziyat chekuvchilar;

- pnevmoniya tashxisi qo`yilganlar;

- tinch holatda nafas qisishi xuruj qiluvchilar;

- o`roqsimon hujayrali anemiyaga chalinganlar;

- pnevmotoraks (o`pka teshilishi) aniqlanganlar;

- quloq infeksiyasi bor bemorlar;

- dekompressiya kasalligi bilan og`riganlar;

- bosh miyada bosim oshishidan (qon ketishi, jarohatlar yoki infeksiya tufayli) qiynaladigan kishilar.

Ekspertlarning qo`shimcha qilishicha, bu ro`yxat turli aviakompaniyalar talablari asosida biroz farqlanishi ham mumkin.