Avvalroq, Toshkent shahridagi maktablardan birida o`qituvchi o`quvchilarni kaltaklagani haqida xabar berilgan edi. Holat yuzasidan Toshkent shahar xalq ta`limi bosh boshqarmasi munosabat bildirdi.
Ma`lum qilinishicha, holat Yashnobod tumanidagi 152-sonli umumta`lim maktabida shu yilning 2 mart kuni dars jadvali bo`yicha beshinchi soatda sodir bo`lgan. Biologiya fani o`qituvchisi G.M. 8-“A” sinfda dars o`tayotgan mahalida o`quvchilar X.D. va O.O.larning telefon o`ynayotganligini ko`rib, ularni bir necha marotaba ogohlantirgan, tanbeh bergan. Ammo o`quvchilar o`qituvchisining tanbehiga ham e`tibor qilmay, bepisandlarcha dars jarayoniga xalaqit qilishda davom etishgan. Oqibatda o`qituvchi G.M. asablarini jilovlay olmagan, o`quvchilarni tartibga chaqirgan, uning tanbehini inobatga olmaganligi tufayli o`qituvchi o`quvchilarni kaltaklagan.
Sodir bo`lgan holat yuzasidan o`quvchilarning ota-onalari huquq-tartibot idoralariga murojaat qilgan. Maktab o`qituvchisi G.M. va o`quvchining onasiga nisbatan ma`muriy choralar qo`llanilgan.
"Hozirgi paytda yuqoridagi holat yuzasidan maktabdagi ta`lim va tarbiya jarayonlari Toshkent shahar xalq ta`limi bosh boshqarmasi tomonidan o`rganilayotganligini bildiramiz", - deyiladi Toshkent shahar XTBB Matbuot xizmati xabarida.
