Armaniston Turkiyaning zilziladan jabr ko`rgan hududlariga beshta yuk mashinasi gumanitar yordam jo`natdi. Ikki davlat o`rtasidagi chegara punkti oxirgi marta 1988 yilda Spitakdagi fojiadan keyin ochilgan edi.
Armaniston va Turkiya o`rtasidagi quruqlik chegarasi Turkiya-Suriya chegarasi yaqinida sodir bo`lgan dahshatli zilzila fonida so`nggi 35 yil ichida birinchi marta ochildi.
Turkiyaning Anadolu axborot agentligining xabar berishicha, Armaniston zilzila zonalaridagi odamlarga beshta yuk mashinasi gumanitar yordam yuborgan.
“Gumanitar yordam olib ketilgan yuk mashinalari chegaradagi Margara ko`prigidan o`tib, zilziladan jabr ko`rgan hududga yo`l oldi”, — deb yozdi Armaniston TIV matbuot kotibi Vahan Hunanyan tivitterda.
“Anadolu” xabariga ko`ra, Armanistonning Margara shahri yaqinidagi o`tish joyi oxirgi marta 1988 yilda ochilgan. O`shanda Spitakdagi eng kuchli zilziladan so`ng Turkiyadan Armanistonga insonparvarlik yuklari etkazilgan. O`shanda zilzila oqibatida 45 minggacha odam halok bo`lgan.
Turkiya va Armaniston o`rtasidagi munosabatlar 1915 yildagi fojiali voqealar bo`yicha turlicha qarashlar tufayli jiddiy murakkablashganligi aytiladi. Bu ko`plab mamlakatlarda, jumladan, Germaniyada ham Usmonli imperiyasidagi arman genosidi deb hisoblanadi. Turkiya bu ta`rifni mutlaqo rad etadi.
Bundan tashqari, Anqara 2020 yilda to`g`ridan-to`g`ri harbiy to`qnashuvga aylangan Tog`li Qorabog` bo`yicha cho`zilgan mojaroda Ozarbayjonni harbiy va siyosiy yo`llar bilan qo`llab-quvvatlamoqda.
Armaniston tashqi ishlar vaziri Ararat Mirzoyan 7 fevral kuni Berlinga tashrifi chog`ida Erevan va Anqara o`rtasidagi quruqlikdagi chegarani ochish bo`yicha muzokaralardagi taraqqiyot haqida gapirgan. Uning so`zlariga ko`ra, AFP agentligi iqtibos keltirgan holda, ikki davlat tomonidan “ijobiy qadamlar” qo`yilgan.
Turkiyaning janubi-sharqida va Suriya shimolida sodir bo`lgan kuchli zilzila qurbonlarining umumiy soni, 11 fevraldagi ma`lumotlarga ko`ra, 25 ming kishidan oshgan. Turkiya prezidenti Erdo`g`onning so`zlariga ko`ra, birgina Turkiyaning o`zida 21 848 kishi o`lgan.
Ayni paytda qutqaruv operasiyasi davom etmoqda, biroq vayronalar ostidan omon qolganlarni topishga umid kamayib bormoqda.
