Prezident Shavkat Mirziyoev sog`liqni saqlash tizimi xodimlari bilan “O`zbekiston tibbiyoti — inson qadri uchun” mavzusida ochiq muloqot o`tkazishi rejalashtirilayotganidan xabaringiz bor.
Ayni paytda ushbu tadbir oldidan olimlar, shifokorlar, hamshiralar, farmasevtlar, sanitariya-epidemiologiya xizmati vakillarining g`oya va takliflari, murojaatlari qabul qilinmoqda.
Xususan, shu kungacha ochiq muloqotga 1295 qisqa raqamli “Sall-markaz” hamda ijtimoiy tarmoqlarda ochilgan alohida elektron manzillar orqali yo`llangan murojaatlar soni 7218 taga etdi.
Ularning:
- 63 foizi — soha rivojiga qaratilgan takliflar,
- 28 foizi — hal etilgan murojaatlar,
- 9 foizi — ijro jarayonidagi muammoli masalalardir.
Jumladan, murojaatlarning:
- 2953 tasi sog`liqni saqlash tizimining birlamchi bo`g`ini,
- 414 tasi ixtisoslashgan markazlar faoliyati,
- 224 tasi tez tibbiy yordam xizmati,
- 132 tasi oliy tibbiy ta`limga daxldordir.
Kelib tushgan murojaatlar orasida sanitariya-epidemiologiya xizmati faoliyatini takomillashtirishga doir takliflar ham bor.
Masalan, sanitariya-epidemiologiya xizmatining tuman (shahar) bo`limlari xodimlari tomonidan O`zbekiston Respublikasi Prezidenti huzuridagi Tadbirkorlik sub`ektlarining huquqlari va qonuniy manfaatlarini himoya qilish bo`yicha vakilni xabardor qilish tartibida o`tkazilayotgan tekshiruvlar natijalari Yagona elektron tizimga kiritib boriladi.
Bu vazifa faqat hududiy boshqarmalar tomonidan amalga oshirilishi belgilangan. Biroq tekshiruvlar soni ko`p bo`lganligi tufayli jarayonning kechikishi bilan bog`liq muammolar yuzaga kelyapti.
Ochiq muloqotga yo`llangan murojaatlardan birida ushbu vakolatni sanitariya-epidemiologiya xizmatining tuman (shahar) bo`limlariga berish taklifi ilgari surilgan. O`z navbatida, bu tadbirkorlik sub`ektlarida o`tkaziladigan tekshiruvlarda qonunbuzilish holatlari oldi olinishiga xizmat qilishi qayd etilgan.
Hududlar kesimida eng ko`p murojaatlar Toshkent shahri (1021 ta), Namangan (664 ta) va Samarqand (487 ta) viloyatlariga to`g`ri kelmoqda.
