Тошкент аэропортида ўтган 10 ой мобайнида 38 килограмм тилла ва заргарлик буюмлари мусодара қилинди, деб хабар беради “telegraf.uz”.
“Тошкент-Аэро” ихтисослаштирилган божхона комплекси ходимлари 2015 йилнинг 10 ойи мобайнида 38,2 килограмм тилла ва заргарлик буюмларининг Ўзбекистон ҳудудидан ноқонуний олиб кирилиши ва олиб чиқиб кетилишига барҳам беришди. Мусодара қилинган заргарлик буюмларининг умумий қиймати 1,7 миллиард сўмга тенг.
Тошкент шаҳри Олмазор туманида яшовчи фуқаро С.Мусажонова Туркиянинг Истанбул шаҳридан 21 жуфт тилладан ясалган зирак ва бошқа 127 та турли заргарлик буюмларини Ўзбекистон ҳудудига ноқонуний олиб кирган.
Ҳужжатсиз заргарлик буюмлари аёлнинг кийимлари орасига яширилган эди. Ундан умумий оғирлиги 509 грамм бўлган тилла тақинчоқлар мусодара қилинган.
Шунингдек, Навоий вилояти Хатирчи туманида яшовчи Д.Мирзаев ҳам Сеул шаҳридан 170 грамм оғирликдаги умумий қиймати 8,9 миллион сўмлик тилла тақинчоқларни Ўзбекистон ҳудудига олиб киришга уринганлиги учун қўлга олинган.
