Юнусобод туманида жамоат тартибини сақлаш юзасидан хизмат вазифасини ўтаётган Миллий гвардия ҳарбий хизматчиси номаълум шахс қўлида пичоқ билан аёл кишини қувиб келаётганини кўриб, зудлик билан кўнгилсизликнинг олдини олишга ошиқади.
Номаълум эркак аёлга етиб олган пайтда Миллий гвардия ҳарбий хизматчиси етиб келиб, аёлни пичоқ билан таҳдид қилаётган эркак қўлидан ажратиб олган. Бу ҳақда ЎзА хабар берди.
Аёлни ҳимоя қилган ҳарбий хизматчини кўрган тартиббузар шу заҳоти қочиб кетган.
Миллий гвардия ҳарбий хизматчиси А.Х. шу ҳудуддаги пост-патруль экипажига ҳолат юзасидан хабар бергач, тартиббузар ортидан экипаж қувиб, Юнусобод тумани 9-даҳада тўхтатилган.
Фуқародан қўлидаги пичоқни ташлаш талаб қилинганида, фуқаро Миллий гвардия ва ППХ ходими талабини бажармасдан, хақорат қилиб, уларни ўзига яқинлаштирмаслик учун тош ва бошқа қўлига илинган нарсаларни ота бошлаган.
Фуқарони ушлаш вақтида ички ишлар ходимининг оёғига пичоқ санчиб олгач, Миллий гвардия ҳарбий хизматчиси Ё.Ф. ПР73 (резина таёқ)ни ишлатишга мажбур бўлган.
Сўнг тартиббузарнинг қўлидаги пичоқни тортиб олиб, қўлига кишан солган. Қўлга олинган шахс Юнусобод туман ИИБ бўлимига топиширилган.
Олиб борилган суриштирув ишлари натижасида фуқаролар Шайхонтоҳур туманида яшовчи эр-хотин С.Н. ва С.А. эканлиги, эри спиртли ичимлик ичгани оқибатида ўзаро жанжаллашиб, шу ҳолат юзага келгани маълум бўлган. Ҳозирда ҳолат юзасидан суриштирув ишлари давом этмоқда.
