2 февраль куни интернет тармоғида “Qashqadaryoda bodi-kamera taqmagan YPX inspektori haydovchidan hujjat talab qildi. Haydovchi esa bunga e’tiroz bildirdi” сарлавҳали видеотасвир жойлаштирилган эди.
Қашқадарё вилояти ИИБ Ахборот хизматининг маълумотига кўра, мазкур видеотасвир, 2020 йил 31 январь куни ЙПХ катта инспектори катта сержант Файзуллаев Боборахим соат 07:30ларда ўзининг “ВАЗ-2107” русумли автомашинаси билан Қарши шаҳарга келаётган вақтида “Дамас” автомашинаси Қарши-Косон йўлининг Қарши тумани Узуннаво қишлоғи рўпарасидаги светафорнинг қизил чироғидан ўтиб келганлиги учун уни ўзининг автомашинаниси билан тўхтатган.
Катта сержант Б.Файзуллаев автомашинасидан тушиб, боди-камерасидан фойдаланмаган ҳолда бош кийимини киймасдан “Дамас” автомашина эшигини очиб, ҳайдовчи Д.Юлдошевга ўзини таништирмасдан, тегишли ҳужжатларини тақдим қилишни сўраган.
Шундан сўнг фуқаро Д.Юлдошев катта сержант Б.Файзуллаевга “командир одамни қўрқитманг, камерангиз йўқ”-деб эътироз билдирганидан сўнг у ўзининг автомашинасидан бош кийимини олиб кийиб боди-камерасини олган ва “Дамас” эшигини очиб ҳайдовчига ҳужжатларини тақдим этишни талаб қилиб, автомашина калитини олиб қўйган.
Фуқаро Д.Юлдошев катта сержант Б.Файзуллаевга “командир бунақа қилишга ҳаққингиз йўқ”,-деб эътироз билдирганида ҳайдовчига “Нима қилишга ҳаққим бору, нимага ҳаққим йўқлигини ўзим билан”-деб, у билан қўпол муомалада бўлиб ҳужжатларини тақдим қилишни талаб қилишда давом этган. Ҳайдовчи ЙПХ инспекторига ҳеч қандай қоида бузмаганлигини, светафорнинг яшил чироғидан ҳаракатланиб келганлигини айтганида, ЙПХ инспектори уни гапларига эътибор бермасдан ҳужжатларини тақдим қилишини, ўзини “Дилбек” эканлигини тасдиқлаб беришини айтганида, ҳайдовчи ЙПХ инспекторига автомашина эшигини ёпишни талаб қилган.
Катта сержант Б.Файзуллаев автомашина эшигини ёпиб ҳужжатларини беришни талаб қилганида, фуқаро унга “Мени қисиб тўхтатдингиз, Сизни бунга ҳаққингиз йўқ, автомашина калитини ҳам олиб қўйдингиз бунинг учун ҳам жавоб берасиз, бундай қилишга ҳаққингиз йўқ, бу ишларингиз учун жавоб берасиз, мен тегишли жойга арз қиламан”-деб, автомашина ҳужжатларини ЙПХ инспекторига тақдим қилганида у ҳужжатларни олиб, “Йўлнинг нариги томонига ўтасиз”-деб, ўзининг автомашинасига миниб йўлнинг қарама-қарши томонига ўтиб тўхтаган.
Шундан сўнг, фуқаро Д.Юлдошев автомашинасидан тушиб, ўзини ўзи тасвирга олиб, машинаси очиқ қолаётганига урғу бериб ЙПХ инспекторининг орқасидан борган.
ЙПХ инспектори фуқаро Д.Юлдошевга нисбатан Вазирлар Маҳкамасининг 2015 йил 24 декабрь кунидаги 370-сонли Қарори билан тасдиқланган “Йўл ҳаракати қоидалари”нинг 31-бандида кўрсатилган қоидабузарликни содир этганлиги учун UZ-19-серияли 70-270501-рақамли маъмурий баённома расмийлаштирган ва ҳайдовчини маъмурий баённома билан таништириб ҳайдовчилик гувоҳномасини маъмурий баённомага илова қилиб, қолган ҳужжатларини тўлиқ қайтариб берган.
Мазкур ҳолат юзасидан ЙПХ катта инспектори катта сержант Файзуллаев Боборахимга нисбатан вилоят ИИБ масъул ходимлари томонидан хизмат текшируви ўтказилиб, ўтказилган текширув давомида, катта сержант Б.А.Файзуллаев хизмат фаолиятини олиб бориши давомида ИИВнинг меъёрий ҳужжатларида кўрсатилган талабларга риоя этмасдан, фуқаролар билан беписандларча қўпол муносабатда бўлиб, ўзининг интизомсизлини намоён қилиб, фуқаролар онгида ИИО ходимлари тўғрисида салбий фикрларни ўйғонишига сабабчи бўлганлиги учун эгаллаб турган лавозимидан озод қилинди.
