“Mon Reve” корхонаси катта миқдордаги ойлик маош берилишини ваъда қилган ҳолда фуқароларни тикувчилик корхонасига ишга чақиришган. Реклама йўлида ОАВ кучидан ҳам самарали фойдаланишган. Фуқаролар рекламаларда ваъда қилинган ойлик маошларига ишониб, улар томонидан қўйилган талабларга кўра, ишга киришдан олдин, тикувчиликни билиш ёки билмаслигидан қатъий назар, 11 млн.721 минг сўм пулни жамият томонидан очилган тикувчилик курсига тўлашган...
Бироқ ҳозирда ваъда қилинган ойлик кўпчиликка берилмаяпти. Турли важ-карсон ва талаблар қўйилмоқда.
Келинг воқеага батафсил аниқлик киритамиз. Хуман.уз интернет сайтида сал аввал “Тадбиркорликми ёки навбатдаги “молиявий пирамида”?!” номли мақола эълон қилинган эди. Унда Тошкент шаҳри, Сирғали тумани, Чоштепа даҳасида фаолият олиб бораётган “Mon Reve” МЧЖ корхонаси фаолиятига оид айрим шубҳали хатти-ҳаракатлар ҳикоя қилинганди.
Мазкур корхона катта миқдордаги ойлик маош берилишини ваъда қилган ҳолда фуқароларни тикувчилик корхонасига ишга чақирган. Реклама йўлида ОАВ кучидан ҳам самарали фойдаланган. Фуқаролар рекламаларда айтилган ваъдаларга ишониб, қўйилган талабларга кўра, ишга киришдан олдин, тикувчиликни билиш ёки билмаслигидан қатъий назар, 11 млн.721 минг сўм пулни жамият томонидан очилган тикувчилик курсига тўлашган.
Шу тартибда "Mon Reve" МЧЖ масул шахслари томонидан юзлаб фуқаролар гуёки ишга қабул қилинган, бироқ улардан олинган маблағ ҳеч қандай ҳужжатларда акс эттирилмаган. Даставвал, корхона бошлиқлари фуқароларни қизиқтириш мақсадида курсни тамомлаган айрим фуқароларга 12 млн. сўм ойлик маош беришган. Бироқ ҳозирда ваъда қилинган ойлик кўпчиликка берилмаяпти. Турли баҳоналар ўйлаб топилмоқда.
Ушбу корхона хийласига алданган фуқаро Севара Маматова “Mon Reve” МЧЖ фаолиятидан шикоят қилади. У ўзи каби юзлаб фуқаролар сарсон бўлётганини айтади. С.Маматова:
“2019 йилда “Mon Reve” МЧЖ корхонаси ҳақида синглимдан эшитдим. Улар Жиззах политехника институтига бориб, ишга таклиф этишган. Синглим иккаламиз Тошкентга келиб, ташкилот билан танишдик ва ишга кирмоқчи эканимизни айтдик. Бироқ улар бу ерга ишга кириш учун икки ойлик ўқув курсида ўқиш кераклиги ва бунинг учун 11 миллион 721 минг сўм тўлаш лозимлигини айтишди. Биз эса тикувчиликни биламиз, 15 йиллик иш стажига эгамиз, ўқишимиз шарт эмас, дедик. Лекин улар “Йўқ, биз француз йўналишида фаолият юритамиз. Франциядан ўқитувчилар жалб қилинган. Икки йиллик меҳнат шартномаси тузамиз, ойлик миқдори 12 миллион сўм”, дейишди. Шундан сўнг биз айтилган суммани тўлаб, ўқишни бошладик. Шахсан мен 203-бўлиб шартнома туздим ”, дейди Севара Маматова.
Мурожаатчининг айтишича, мазкур икки ойлик курсда ўқув дастурининг ўзи мавжуд эмас. “Қарийб 12 миллион сўмлик курсда оддий листга нина юргазиш, салфеткани қайиришни ўргатишди. Ҳатто 24 миллионлик тўлов қилганлар ҳам бўлди. Республиканинг барча ҳудудларидан келишди. Таҳминан 150 кишилик аудиторияга 400 нафаргача одам жойлашарди. Бир дона тикув машинасига 3 одам бириктириларди”, дейди мурожаатчи.
“Шартномага кўра, биз икки ой ўқидик. Қўлимизга буни тасдиқловчи ҳеч қандай ҳужжат берилмади. 2019 йилнинг 17 октябрь куни меҳнат шартномаси тузилди. Шартнома шартига кўра, улар орадан бир ой ўтиб, ойлик бериши керак эди. Бироқ турли баҳоналар билан бу декабргача чўзилди. Декабрда иккига бўлиб, 12 миллион сўм беришди. Буни ҳам улар ойлик эмас, балки корхонада ишлаб чиқариш бўлмаётгани сабабли, моддий ёрдам бердик, дейишди. Кейин эса таътил беришди. Умуман олганда барчага шу принцип. Пул тўлайди курс учун ва бу пулни 4-5 ойда худди ойлик каби қайтариб беради. Пул қайтариши билан жавоб бериб юборилади. Ҳозир ишни давом эттиришимизни айтсак, ишчилар сараналяпти. Кескин қисқаради. Иккита ўқувчи обкелсанг, сен билан шартномамиз давом этади, дейишяпти”...
С.Маматованинг айтишича, ҳозир ўқув курсининг муддати ва тўлов миқдори ўзгарган. Яъни ўқиш муддати 5 ойга чўзилган. Тўлов миқдори эса 8 миллион 700 минг сўм этиб белгиланган.
Англаган бўлсангиз, мазкур ташкилотнинг иш юритуви “молиявий пирамида”ни эслатади. Яъни курс учун деб одамларнинг пули олинади ва 4-5 ой давомида ундан фойдаланилади. Сарфланган пуллар ҳуддики ойлик тарзида “ишчи”га қайтарилади ва шу ерда “ишчи”лар билан ўртадаги “муносабат” тугайди. Давом эттиришнинг йўли ўзи каби “икки ишчи”ни, аниқроғи содда тикувчини корхонага жалб қилиш.
Бу ҳолатга масъул ташкилотлар эътибор қаратиши, фаолияти ўрганилиб, ҳуқуқий баҳо берилиши керак, деб ёзилади мақолада. Зора, шу билан яна бир неча юз ҳамюртларимизнинг товламачилик қурбонига айланиш эҳтимолининг олди олинса...
