Меҳмонхона қурдирган тадбиркорга давлат томонидан 4 080 000 000 сўмлик сертификат топширилди. Сертификат Ўзбекистон Президентининг 2019 йил 5 январдаги “Туризм тармоғини жадал ривожлантиришга оид чора-тадбирлар тўғрисида”ги 4095-сонли Қарорига мувофиқ харажатларни қоплаш учун топширилган.
Сертификат 21 декабрь куни “Amirsoy” тоғ-чанғи курортининг тантанали очилиш маросими доирасида Бош вазир ўринбосари Азиз Абдуҳакимов томонидан Самарқанддаги “Grand Hotel Sogdiana” меҳмонхонаси эгасига топширилди. Вазирлар Маҳкамасининг 2019 йил 27 майдаги “Меҳмонхона хўжалиги фаолиятини янада ривожлантириш учун қулай шарт-шароитлар яратиш чора-тадбирлари тўғрисида”ги 433-сонли Қарорига биноан инвесторларга янги қурилган меҳмонхона “3 юлдуз” тоифасига ва 50 хонадан кам бўлмаган хоналар фондига эга ёки “4 юлдуз” тоифасига ва 100 хонадан кам бўлмаган хоналар фондига эга бўлганда Давлат бюджетидан субсидия ажратилади.
Бунда янги қурилган меҳмонхона 2022 йилнинг 1 январига қадар фойдаланишга топширилиши лозим. Инвесторларга субсидия 1 маротаба ажратилиб, унинг миқдори келгуси йил учун Давлат бюджети параметрларини тасдиқлаш жараёнида ушбу миқдорни ҳар йили индексация қилган ҳолда: - “3 юлдуз” тоифасига эга меҳмонхоналардаги ҳар бир хона учун 40 миллион сўмни; - “4 юлдуз” тоифасига эга меҳмонхоналардаги ҳар бир хона учун 65 миллион сўмни ташкил этади.
Таъкидлаш лозимки, 2019 йилнинг 13 ноябрида “Туризм хизматларини сертификатлаштириш маркази” ДУК қарори билан “Grand Hotel Sogdiana” меҳмонхонасига “3 юлдуз” тоифаси берилди.
Меҳмонхонани сертификатлаштириш жараёнида “Катта тўртлик”ка кирувчи ҳамда аудиторлик, солиқ ва консультация хизматларини тақдим этувчи “KPMG” халқаро компанияси вакиллари ҳам иштирок этишган. “Grand Hotel Sogdiana” меҳмонхонаси “Dobusiya Samarqand Aqualand” МЧЖга тегишли бўлиб, у ерда 204 нафар ташриф буюрувчини қабул қилишга мўлжалланган 102 номер мавжуд.
Меҳмонхона қурилиши 2017 йилнинг августда бошланган. 2019 йил сентябрда эса объект фойдаланишга топширилган. Меҳмонхонада 35 дан ортиқ янги иш ўрни яратилди. Меҳмонхонада жойлаштиришдан ташқари қуйидаги қўшимча хизматлар тақдим этилади: - Бассейн (ёпиқ турдаги); - Соғломлаштириш маркази; - Бизнес маркази; - Spa-марказ (фин, турк); - Очиқ аквапарк; - Велосипед ижараси; - 150 ўринли конференц-зал.
