Тинч океанидаги оролда жойлашган Самоа мамлакати аҳолиси уч ҳафтадан бери қизамиқ касаллигидан азият чекмоқда. Ҳозиргача 6 нафар одам ҳалок бўлди, дея хабар бермоқда таржимон.уз. арабнюс.ком сайтига таяниб.
Соғлиқни сақлаш ходимларининг таъкидлашича, вафот этганларнинг аксарияти 2 ёшдан кичик бўлган. Жами бўлиб 716 кишида қизамиқ касаллиги қайд этилган, уларнинг 100 га яқини касалхонага ётқизилган. Мамлакатда шанба куни фавқулодда ҳолат эълон қилинган.
Душанбада эса, барча мактаблар ёпилди. Болалар оммавий тадбирларда йиғилиши тақиқланди ва барча фуқароларнинг касалликка қарши эмланиши мажбурий этиб қўйилди. Қизамиқ касаллиги Самоа оролига Янги Зеландиялик сайёҳ орқали кириб келгани тахмин қилинмоқда. 18 ноябрь куни Янги Зеландия Бош вазири Якинда Ардерн Самоага 3000 та вакцина, шунингдек, ҳамширалар ва тиббий буюмларни юбораётганини айтди. Шунингдек, Тонга, Фижи ва Янги Зеландияда ҳам қизамиқ тарқалгани ҳақида хабар берилган. Аммо бу уч мамлакатдаги вазият Самоадагичалик жиддий эмас.
