Мамлакатимизнинг Сеул шаҳридаги Элчихонасининг Консуллик бўлими берган маълумотга кўра 2019 йилнинг 27 июль куни Кванджу шаҳридаги (Корея Республикаси) тунги клублардан бирида юз берган бино қисмининг қулаб тушиши оқибатида ҳалок бўлган ва жароҳатланганлар рўйхатида Ўзбекистон фуқаролари, жумладан сув спорти турлари бўйича жаҳон чемпионатида иштирок этаётган юртимиз спорт делегацияси аъзоларининг номлари йўқ. Ўзбекистон ташқи ишлар вазирлиги ахборот хизмати хабарида қайд этилишича, шаҳар полицияси ҳам ушбу маълумотни тасдиқлаган.
Жанубий Корея ҳуқуқни муҳофаза қилиш органлари хабарига кўра мазкур ҳодиса оқибатида 2 киши ҳалок бўлган, 17 киши, жумладан 9 нафар жаҳон чемпионатининг хорижлик иштирокчилари жароҳат олган.
Бир оз аввал оммавий ахборот воситаларида тўққиз нафар спортчи жабрлангани ҳақида хабарлар тарқалганди. Унда тўрт америкалик, икки янги зеландиялик, бир нафар голландиялик, италиялик ва бразилиялик ҳамда жаҳон чемпионатига алоқадор бўлмаган икки нафар Ўзбекистон фуқароси жароҳатлангани маълум қилинган эди.
