Яқин Шарқдаги энг йирик Arabian Travel Market халқаро туризм кўргазмасида Ўзбекистон Республикаси Туризмни ривожлантириш давлат қўмитаси вакиллари ва туроператорлар миллий стенд билан иштирок этишмоқда. Кўргазма доирасида ўзбекистонлик ватандошлар ва хорижий инвесторлар билан музокаралар ўтказилди. Бу ҳақда Туризмни ривожлантириш давлат қўмитаси матбуот хизмати хабар бермоқда.
Ўзбекистоннинг БААдаги бош консуллиги билан ҳамкорликда араб давлатида турли соҳаларда фаолият юритаётган ватандошларимиз билан учрашув бўлиб ўтиб, у ерда мамлакатимизнинг туристик салоҳиятини кенг тарғиб қилишга доир келишувларга эришилди.
Ярмарка доирасида, шунингдек, Ўзбекистонда туризм соҳасига инвестиция киритишни истаган, жойлашув воситаларини қуриш истагида бўлган бир неча сармоядорлар билан музокаралар олиб борилди. Осиё давлатларида Ўзбекистоннинг сайёҳлик салоҳиятини кенг тарғиб қилиш учун қатор блогерлар ва телешоулар тайёрловчи хусусий корхоналар вакиллари билан ҳам келишувларга эришилди.
Арабиан Травел Маркет 2019 кўргазмасида иштирок этувчилар асосан меҳмонхона бизнеси вакиллари, туроператорлар, транспорт компаниялари, меҳмондорчилик саноати мутахассислари, ўқув муассасалари ва ихтисослашган оммавий ахборот воситалари бўлиб, бундай нуфузли кўргазмада иштирок этиш янги бозорларга чиқиш, янги мижозлар орттириш ҳамда мавжуд алоқаларни мустаҳкамлаш, янги маҳсулотларни йўлга қўйиш имконини беради.
Б2Б форматидаги учрашувлар натижасида, бутун дунё сайёҳлари ва туроператорлари учун 2800 дан ортиқ туристик маҳсулот ва йўналишлар намойиш қилинади. Кўргазма 28 апрелдан 1 майга қадар ўтказилади.
