Сурияда “Ал-Қоида” жангарилари томонидан 3 йил аввал асирга олинган япониялик журналист Дзюмпэй Ясуда озод этилди, деб маълум қилди Reuter ахборот агентлиги.
Япония ҳукумати вакили Есихидэ Суганинг маълум қилишича, ҳозирда 44 ёшли журналист Туркиянинг Антакя туманидаги муҳожирларни қабул қилиш бюросига олиб келинган.
Айни вақтда Япония томонидан ушбу шахс ҳақиқатан ҳам Дзюмпэй Ясуда эканлигининг тасдиқланиши кутилмоқда. Таъкидланишича, журналист 2015 йилда Туркия ҳудуди орқали ноқунуний равишда Сурияга ўтган. Ясуда Сурияга 2015 йилда кириб, террорчилар томонидан қўлга олинган. Жангарилар унинг озод этилишига 10 млн. доллар сўрашган, бироқ Япония ҳукумати бу талабни бажаришдан бош тортган эди.
