Қўшма Штатлар Шимолий Кореяга қарши янги санкцияларни ҳозирча жорий этмайди.
Оқ уй бугун КХДРга қарши навбатдаги чеклов чоралари ҳақидаги қарорни маълум қилиш ниятида эди. “Қора рўйхат”да 30 та фирма, хусусан, Россия ва Хитойга тегишли корхоналар ҳам бўлиб, таъкидланишича, Сингапурда ўтказилиши режалаштирилган икки давлат саммитининг муваффақиятсизликка учрагани важидан ишлаб чиқилган янги санкциялар КХДРни хорижий таъминотдан узиб қўйишни кўзда тутган бўлган.
Эслатиб ўтамиз, Вашингтон ва Пхеньян жорий йилнинг 12 июнида Сингапурда АҚШ ва КХДР саммитини ўтказишга келишиб олган эди. Аммо, 24 майда Қўшма Штатлар президенти Дональд Трамп Пхеньян томони “душманлик руҳидаги” баёнотларини рўкач қилиб, Ким Чен Ин билан учрашув бекор қилингани, аммо бу келгусида икки давлат саммити ўтказилмайди, дегани эмаслигини маълум қилди. Шундан сўнг КХДР етакчиси Жанубий Корея раҳбари Мун Чже Ин билан Пханмунжомда мулоқот қилди. Куни кеча Оқ уй раҳбари ҳам Сингапурдаги саммитга тайёргарлик кўрилаётгани, хусусан, АҚШ делегацияси бетараф ҳудуд Пханмунжонда Пхеньян вакиллари билан музокара олиб борганини маълум қилди.
