Туркманистонда аёллар қоматини бўрттириб кўрсатувчи тор кўйлак кийиш норасмий тарзда тақиқланди, деб хабар берди “Туркманистон альтернатив янгиликлари” портали.
Нашрнинг хабар беришича, эндидан бошлаб аёллар қоматини кўз-кўз қилмайдиган либослар кийишлари лозим. Кўйлакнинг узунлиги ерга тегадиган бўлиши, фақатгина оёқ кийимнинг уч томони очиқ бўлиши, енги эса бармоқларча бўлиши талаб этилмоқда.
“Биз ўтмишга қайтмоқдамиз. Ёшим 20 да, бироқ катта бувим кийган либосларни кийишга мажбурман”, деди Ашхободда яшовчи қизлардан бири.
Гўзаллик салонларида ҳам иш қизғин. Сариқ сочли аёллар сочларини қора рангга бўяшмоқда. Тунги 22.00 дан кейин кўчада бирга юрган эркак ва аёллар ҳам қўлга олинмоқда. Кечаси эркак ва аёлнинг бирга сайр қилишлари учун никоҳ гувоҳномаси талаб этилмоқда.
Хуқуқ-тартибот идораси ходимлари бундай чекловлар ёшларни ёмон йўлларга киритиб кетишдан асрашини таъкидлашмоқда.
