10 йил илгари мушугини йўқотиб, уни ўлди деб ўйлаган америкалик аёл уни тирик учратди, деб хабар берди lenta.ru нашри.
Чикаго шаҳрида яшовчи Лора Клебан (Laura Kleban) ва унинг оила аъзолари бундан ўн йил илгари йўқотиб қўйган Оливер лақабли мушукларини машина босиб кетган, деб ҳисоблашарди. Чунки улар мушукни қидириб юришганда, йўл бўйида худди Оливерга ўхшаган мушукнинг машина босиб кетган жасадига дуч келишган эди. Ўшанда мушук 2, эгаси эса 17 ёшда эди.
Бироқ яқинда эгасиз мушукларни йиғиш билан шуғулланувчи кўнгиллилар ташкилоти аъзоси Ким Вонеш (Kim Vonesh) тасодифан Оливерни топиб олди. Маълум бўлишича, Оливерни маҳаллий қўриқчилардан бири боқиб олган. Кўнгиллилар махсус микрочип орқали мушукнинг Оливер эканлигини аниқлашди ва эгасига қайтаришди.
