Совчилар, учрашув, тўй… буларнинг барчаси кўпчилик аёлларга таниш. Оила қургандан кейин ялқов эрга учраганлар кимни айблашни билмай бошлари қотиши аниқ. Баъзилар ялқов эрни тарбиялашга киришса, қолганлари «тақдир» экан, дея қўл силташади. Хўш, аёлларнинг бош оғриғи бўлган «ялқов», «дангаса» эрнинг касалини тузатиш мумкинми?
Тузалмайдиган ялқовлар
Агар турмуш ўртоғингиз:
— тез-тез иш жойини ўзгартириб туради ёки ишламайди, сабаб қилиб иш жойидаги ходимлар ва ишнинг унга тўғри келмаслигини кўрсатади;
— ҳар доим янгилик қидираётганини таъкидлайди, бироқ жиддийроқ иш билан шуғулланиш хаёлига келмайди;
- у танлаган касб ёки ишнинг умуман даромади йўқ. Шунга қарамасдан ишлашни давом эттиради, чунки унга ёқади;
- доим сиздан яна озгина чидаб туришни, сабр қилишни сўрайди. Сиз ҳам турмуш қурганингиздан бери кутмоқдасиз;
- ишлаш қочиб кетмаслигини, ёшликда ўйнаб-кулиш кераклигини таъкидлайди;
- пул етишмовчилигидан сизга қарз олишни маслаҳат беради;
- уст-бошига ҳам умуман эътибор бермайди (ялқовлар одатда, ҳатто, ўзига ҳам беътибор);
— пул топишнинг осон йўлларини топишга ҳаракат қилади;
— иккита олий ўқув юртини битирганига қарамай, учинчи марта ҳам янги касбга ўқишга қарор қилади, бироқ тайинли касбни танламайди;
— уйланган бўлса-да оиласини таъминлаб турган ота-онаси қанотидан чиқиб кетишни истамайди, оилада ундан ташқари яна иккита уйланган ака-укалари бўлса ҳам;
— аёли топган пулни ҳисоблашни ва келажагини ўйлашни ёқтиради. Мабодо, рафиқаси ишдан бўшамоқчи бўлса, қаттиқ сиқилади, даромад манбаини йўқотиб қўйишдан қўрқади.
Бу рўйхатга киритилганларнинг ялқовлик, пул ишлаб топиш ва оиласини боқишга ҳаракат қилмаслик, улар тақдирини ўйламаслик қонига сингиб кетган. Одатда, бундайлар аёлларининг барча рўзғор-ташвишларини ўз бўйниларига олганларидан хурсанд ҳам бўлишади. Ҳаёт қийинчиликларидан нолишади, бироқ ўзлари қимирлаб пул топишни, уй-рўзғор ишларида аёлига ёрдам бериш кераклигини ўйлаб ўтиришмайди. Афсуски, бу жиҳатлар фақатгина турмуш қургандан сўнг юзага чиқади.
Ўзингиз сабаб бўлган ҳолатлар.
1-муаммо. Турмуш ўртоғингиз уй-рўзғорда сизга кўмаклашишини хоҳлайсиз, бироқ бари бекор. Сабабини аниқлаймиз.
- Турмуш ўртоғингизнинг ҳар бир ҳаракатини назоратга олмоқчисиз. Эркаклар эса назоратга тоқат қилолмайдилар. Қанча кўп камчилигини кўрсатиб, қилган хатоларси учун айблайверсангиз, унда ўзига яраша ҳимоя қобиғи пайдо бўлади ва ҳар қандай уриниш, таъкид, илтимос эътиборсиз қолади.
- Ҳамма масъулиятни ўзингизнинг нозик елкангизга олиб, уни «эркалатиб» юборгансиз.
2-муаммо. Турмуш ўртоғингиз кам пул топади, иш жойини ўзгартиришни хоҳламайди. Янги иш топишдан кўра ҳеч нарса қилмасликни афзал билади.
- Дунёда ўзлари мустақил ҳаракат қилиб, ўзгаларнинг ёрдамисиз муваффақиятга эришадиган эркаклар кам. Бу ачинарли ҳол, лекин ҳақиқат. Улар доим қўллаб-қувватлашга, кимдир маълум бир йўлга йўналтириб туришга муҳтож, шундагина руҳланиб, мақсад сари олға қадам ташлашади. Асосийси, уларнинг нозик қалбларини жароҳатлаб қўймаслик керак. Агар табиатан фаол бўлсангиз, унда йўналтирувчи вазифасини бўйнингизга олишга тўғри келади. Акс ҳолда, эски ҳаммом — эски тослигича қолиб кетади.
- Турмуш ўртоғингиз санъат, ижод билан боғлиқ бўлиб, ўта романтик. Қалб тубида ҳали-ҳануз «ўз идеалини»қидириш билан овора. Бу турдагилар ўзгаришни хоҳлашмайди, ҳатто, севган ёрлари томонидан ҳам қандай бўлса, шундайлигича қабул қилинишларини исташади. Бу ҳолатда унинг «идеали» бўлишни маслаҳат беришдан ўзга чорамиз йўқ. Шундагина хоҳлаганингизни муҳайё қилишади.
Дангасаликдан қутулиш йўллари
Турмуш ўртоғингиз ким бўлишидан қатъи назар хотиржамликни сақлаб, муаммоларга фалсафий ёндашинг. Сизни айнан нима қониқтирмаётганлигини ўйлаб, таҳлилдан ўтказинг, ўз-ўзингизга савол беришга ва жавоб олишга ҳаракат қилинг. Агар уйдаги тартибсизлиги ёқмаса:
1-усул: (пайпоқларини ҳар жойга ташлаб кетса) пайпоқларидан бирини дастрўмол ўрнига чўнтагига солиб қўйинг. Дастрўмол ўрнига пайпоқ чиқиб, мулзам бўлгач, масала ҳам ҳал бўлади.
2-усул: бир ой давомида қилиниши керак бўлган ишларни кунига бир мартадан хотиржам ҳолда гапиринг. Бу усулдаги «уй гипнози» бир ойдан сўнг ўз самарасини беради.
Камола ЭРМАТОВА, руҳшунос
Манба: “SUG‘DIYONA” газетаси
