ТОШКЕНТ МЕТРОПОЛИТЕНИ 40 ЁШДА
“Халқ сўзи” нашининг хабар беришича, бундан қирқ йил муқаддам, яъни 1977 йилнинг ноябр ойида Тошкент шаҳрида метрополитен ишга тушган эди. Бевосита Шароф Рашидов ташаббуси билан барпо этилган мазкур тарнспорт линиясида бугунги кунда ҳам йўловчиларга сифатли хизмат кўрсатилиб келинмоқда.
Тошкент метрополитени утча — "Чилонзор", "Ўзбекистон" ва "Юнусобод" йўналишалирдан иборат. Поездларнинг ўртача тезлиги соатига 39, максимал тезлиги соатига 65 километрни ташкил этади. Тошкент метрополитенида кунига ўртача ҳисобда 160—180 минг йўловчи ўз манзилига етказиб қўйилади. Уларга қулайлик яратиш мақсадида баъзи бекатларга эскалаторлар ўрнатилган. Ҳар бир бекатнинг бадиий меьморлик ҳамда ҳайкалтарошлик нуқтаи назаридан безатилиши рамзий равишда шу бекат номини акс эттиради. Уларда маданий, монументал декоратив ва амалий санъатнинг миллий анъаналари ўзифодасини топган.
9 балли зилзилага бардош берувчи метрополитеннинг умумий узунлиги 39 километр, бекатлар сони 29 та. 2015 йилдан бошлаб метрода ташқи ва ички кўриниши янгича дизайндаги вагонлар ҳаракатлана бошлади.
Айни пайтда эса Президентимиз Шавкат Мирзиёев ташаббуси билан аҳолининг талаб ва эҳтиёжлари, пойтахтимизнинг келгуси ривожланиши инобатга олиниб, Тошкент шаҳрида ер усти халқа метро линиясини барпо этиш бўйича ишлари изчил давом эттирилмоқда. Умумий узунлиги 52,1 километрдан иборат мазкур метро йўналишининг 50,5 километри баландлиги 6 метрлик эстакадалар орқали ўтказилади, 1,6 километри эса ер устида қурилади.
2017-2021 йилларга мўлжалланган лойиҳа беш босқичда амалга оширилади. Дастлабки босқичда Тошкент метрополитенининг "Дўстлик" бекатидан Қўйлиқ бозоригача бўлган қисми қурилади. Узунлиги 11 километр бўлган ушбу қисмда саккизта бекат бунёд этилиши мўлжалланмоқда. Иккинчи босқич Қўйлиқ бозори билан "Олмазор" бекатини боғлайди. Учинчи босқичда "Олмазор"дан "Беруний" бекатигача бўлган қисм барпо этилади. Кейинги босқичда иншоот "Беруний"дан "Бодомзор" бекатигача қурилади, сўнгги босқичда "Дўстлик" бекатига уланади.
Қурилиш “Ўзбекистон темир йўллари” акциядорлик жамиятига қарашли “Кўприкқурилиштрести” унитар корхонаси бунёдкорлари томонидан амалга оширилмоқда.
