АҚШ меҳнат департаменти маълум қилишича, иш берувчилар 178 мингта янги иш ўрни яратган. Бу кутилганидан анча юқори кўрсаткич бўлиб, ишсизлик даражаси эса 4,3 фоизга тушган.
Таҳлилчиларнинг айтишича, мазкур ўсиш февраль ойида йирик йўқотишларга сабаб бўлган соғлиқни сақлаш соҳасидаги иш ташлашлар якунлангани билан изоҳланиши мумкин. Шу билан бирга, бу рақамлар сўнгги бир йилда сезиларли секинлашган меҳнат бозорининг барқарорлигига бўлган ишончни ошириши мумкин.
Шунингдек, ушбу ҳолат Федерал резерв тизими томонидан фоиз ставкаларини пасайтиришни кечиктириш учун асосларни кучайтириши кутилмоқда. Банк нефть нархларининг ошиши иқтисодиётга қандай таъсир қилишини кузатмоқда.
АҚШ президенти Дональд Трамп Марказий банкни қарз олиш харажатларини кескин камайтиришга чақирган. Унинг фикрича, бу иқтисодиётни рағбатлантиради.
Бироқ Федерал резерв тизими сўнгги ойларда инфляциядан хавотир билдирмоқда. Инфляция ҳануз 2 фоизлик мақсаддан юқори даражада сақланиб қолмоқда. ФРТ раиси Джером Пауэлл иқтисодиётни нозик мувозанатда деб баҳолаб, янги иш ўринлари яратилиши суст, қисқартиришлар эса чекланган даражада эканини таъкидлаган.
Оқ уй томонидан иммиграцияга босимни кучайтириш ва тарифлар жорий этиш каби сиёсий ўзгаришлар ҳам бозор динамикасига таъсир кўрсатган.
Эрондаги уруш мазкур жараёнларни янада кучайтириши мумкин. Бироқ унинг тўлиқ таъсирини баҳолаш учун ҳали эрта. Қайд этилишича, Меҳнат департаменти одатда иш берувчилар ва хонадонлар ўртасидаги сўровларни ой ўрталарида ўтказади, бу эса уруш бошланганидан бир неча ҳафта ўтиб амалга оширилган.
