Президент Шавкат Мирзиёев тўловга қобилиятсизлик институтини такомиллаштириш бўйича тақдимот билан танишди. Унда амалдаги тизим корхонани тиклашдан кўра, уни тугатишга кўпроқ йўналтирилгани танқид қилинди.
Қайд этилишича, молиявий қийин аҳволга тушган 93 минг тадбиркордан фақат 10 мингтаси бўйича банкротлик ишлари қўзғатилган, санация механизмлари эса деярли ишламаяпти.
Янги таклифларга кўра, махсус агентлик ташкил этиш, суд бошқарувчилари фаолиятини кучайтириш ва жараёнларни тўлиқ рақамлаштириш режалаштирилмоқда.
Шунингдек, қийин аҳволга тушган бизнесни қўллаб-қувватлаш учун кредитларни кечиктириш, реструктуризация қилиш ва давлат кўмагидаги санация чораларини кенгайтириш кўзда тутилган.
