Ҳозирча бу маълумотлар расмий идоралар томонидан тасдиқланмаган.
Туркия оммавий ахборот воситаларида ёзилишича, Истанбулнинг Умрания туманида яшаган аёллар иши юзасидан олиб борилаётган тергов чоғида яна бир қотиллик излари очилган. Гап 23 январдан бери бедарак деб рўйхатга олинган 32 ёшли Сайёра Эргашалиева ҳақида кетмоқда.
Терговчилар хавфсизлик камералари ёзувларини қайта кўриб чиққан. Кадрларда гумонланувчиларнинг хонадондан қора қоплар ва оқ жомадон олиб чиққанини, уни Шишли туманидаги чиқинди қутисига ташлаб кетгани акс этгани айтилмоқда. Тергов версиясига кўра, аввал Сайёра Эргашалиева, кейин эса Дурдона Ҳакимова ўлдирилган бўлиши мумкин.
Маҳаллий нашрлар гумонланувчилар сўроқда Сайёра Эргашалиевани пичоқлаб ўлдиргани ва жасадни бўлаклаб, турли чиқиндихоналарга ташлаганини тан олганини ёзмоқда. Бироқ бу маълумотлар ҳозирча расмий суд қарорлари билан тасдиқланмаган.
Эслатиб ўтамиз, 24 январ куни Истанбулнинг Шишли туманидаги чиқинди контейнеридан бошсиз аёл жасади топилганди. Кейинчалик у Ўзбекистон фуқароси Дурдона Ҳакимова экани маълум қилинди. Ушбу воқеа Анқара ва Истанбулда норозилик намойишларига сабаб бўлган. Тергов ҳаракатлари давом этмоқда.
