АҚШ Эрондаги ўз фуқароларини мамлакатни зудлик билан тарк этишга чақирди. Бу ҳақда АҚШнинг Эрондаги элчихонаси расмий огоҳлантириш эълон қилди.
Қайд этилишича, ҳозирда Эронда хавфсизлик чоралари кучайтирилган, айрим йўллар ёпилган, жамоат транспорти фаолияти издан чиққан ҳамда интернет алоқаси чекланган.
Элчихона Эрон ҳукумати мобил ва стационар алоқа ҳамда миллий интернет тармоқларига киришни чеклашда давом этаётганини билдирган.
Шунингдек, авиакомпаниялар Эронга ва Эрондан парвозларни чеклаётгани ёки бекор қилаётгани қайд этилган. АҚШ фуқароларига, агар хавфсиз бўлса, Эронни қуруқлик орқали Арманистон ёки Туркия томонга тарк этиш имкониятини кўриб чиқиш тавсия этилган.
Элчихона ҳозирча мамлакатдан чиқиб кета олмаётган фуқароларга хавфсиз жой топиш, озиқ-овқат, сув ва дори-дармон захирасини тайёрлаб қўйиш, маҳаллий ОАВни кузатиб бориш ҳамда яқинлари билан доимий алоқада бўлишни маслаҳат берган.
Эслатиб ўтамиз, жорий йилнинг 13 январь куни ҳам АҚШ Давлат департаменти Эронда юз берган норозилик намойишлари сабабдан мамлакатда бўлиб турган америкаликларни зудлик билан ҳудудни тарк этишга ундаган эди.
