Трампнинг таъкидлашича, давлат ишлари жуда кўп бўлгани сабаб ҳужжатларни ўрганишга вақти етишмаяпти.
“Менда жуда кўп вазифалар бор. Мен доим иш билан бандман”, — деди АҚШ президенти журналистларнинг саволларига жавобан.
Президентнинг сўзларига кўра, у ҳозирда асосий эътиборни мамлакатни бошқариш, шунингдек, жамоатчиликни амалга оширилаётган ишлар ва эришилаётган натижалар ҳақида хабардор қилишга қаратган.
Шу билан бирга, Трамп жамиятда Жеффри Эпштейн шахсига бўлган қизиқишнинг кескин ортганидан ҳайратда эканини билдирган. Унинг фикрича, молиячи тириклигида кенг жамоатчилик эътиборида бўлмаган, аммо вафотидан сўнг унга нисбатан қизиқиш сезиларли даражада ошган.
Эслатиб ўтамиз, 30 январь куни АҚШ Адлия вазирлиги болаларни жинсий эксплуатация қилиш ва зўравонликда айбланган Жеффри Эпштейн иши бўйича 3 миллиондан ортиқ ҳужжатни махфийликдан чиқарган эди.
Ушбу материалларда Дональд Трамп ва унинг рафиқаси Мелания Трампнинг исмлари ҳам тилга олинган. Шунингдек, архивда Эпштейннинг собиқ ёрдамчиси берган кўрсатмалар ҳам мавжуд.
