Бу ҳақда у ўзининг X (Twitter) ижтимоий тармоғидаги саҳифасида ёзиб қолдирган.
Президентнинг билдиришича, у ташқи сиёсат учун масъул расмийларга Вашингтоннинг музокаралар бўйича таклифига жавоб тайёрлашни топширган. Пезешкиёнга кўра, музокаралар “адолатли ва холис” бўлиши, шунингдек, Эрон учун муҳим бўлган тамойиллар — қадр-қиммат, донолик ва миллий манфаатлар асосида олиб борилиши лозим.
У ҳар қандай мулоқот Эроннинг миллий манфаатларини инобатга олган ҳолда қурилиши шартлигини таъкидлаб, босим, таҳдид ва “асоссиз талаблар” мавжуд бўлган шароитда музокаралар ўтказилиши мумкин эмаслигини билдирган.
Шу билан бирга, Эрон Ташқи ишлар вазирлиги матбуот котиби Исмоил Бағаийнинг айтишича, Теҳрон ва Вашингтон ўртасидаги эҳтимолий музокаралар яқин кунларда Туркияда бўлиб ўтиши мумкин. Унинг таъкидлашича, Эрон учун асосий масалалардан бири — АҚШ ва Ғарб давлатлари томонидан жорий қилинган санкцияларни бекор қилиш ҳисобланади.
Маълум қилинишича, бундан олдин АҚШ Президенти Дональд Трамп Эрон томон Abraham Lincoln авианосеци бошчилигида ҳарбий флот юборилганини эълон қилган. У Эронни ядровий қуролдан воз кечиб, “адолатли ва тенг ҳуқуқли” келишув тузишга чақирган ҳамда акс ҳолда ҳарбий зарбалар кучайтирилиши мумкинлигини айтган.
Бунга жавобан, Эрон ташқи ишлар вазири Аббос Ароқчи АҚШ таҳдидларини давом эттирар экан, мамлакат тўғридан тўғри музокараларга киришмаслигини маълум қилган.
