Бирлашган Араб Амирликларининг Дубай шаҳрида 2025 йил апрель ойида содир бўлган жанжал юзасидан суд ҳукми эълон қилинди. ОАВда тарқалган хабарларга кўра, 22 январь куни бўлиб ўтган очиқ суд мажлисида Ўзбекистон фуқароларидан олти нафари ўлим жазосига, яна бир киши эса умрбод қамоқ жазосига ҳукм қилинган. Ушбу хабарларга ойдинлик киритиш мақсадида darakchi.uz Ташқи ишлар вазирлиги билан боғланди.
“2025 йилнинг апрель ойида Амирлик ҳудудида оммавий муштлашувда иштирок этган 8 нафар Ўзбекистон фуқароларига жорий йилнинг 21 январь куни суд ҳукми билан умрбод озодликдан маҳрум қилиш жазоси тайинланган. Шунингдек, бир нафар фуқарога 25 йил озодликдан маҳрум қилиш жазоси тайинланган”, - деди ТИВ матбуот котиби.
Эслатиб ўтамиз, 2025 йил апрель ойида Дубайдаги ёқилғи қуйиш шохобчаларидан бирида ўзбекистонликлардан иборат икки гуруҳ ўртасида қонли тўқнашув юз берган. Можаро оқибатида бир киши пичоқ зарбасидан вафот этган, яна бир шахс оғир тан жароҳати олиб комага тушган. Кейинчалик комадаги жабрланувчи ҳам вафот этиб, қурбонлар сони икки нафарга етган.
Тергов маълумотларига кўра, олдиндан келишмовчилиги бўлган икки гуруҳ аъзолари тасодифан учрашиб қолган. Қизил рангли Мерcедес автомобилидан тушган шахсга бир неча киши ҳужум қилиб, уни пичоқлаган, унинг шериги эса қочишга уринган, бироқ қўлга олиниб калтакланган. Дубай полиси воқеа жойини ўраб олиб, кузатув камералари ёзувлари ва гувоҳлар кўрсатмалари асосида гумонланувчиларни тез фурсатда аниқлаган ва меҳмонхоналардан бирида қўлга олган.
Кейинчалик ушбу иш доирасида жами 15 нафар ўзбекистонлик қўлга олингани маълум қилинган эди. Дубай жиноят қидирув бошқармаси бундай ҳолатлар икки давлат ўртасидаги визасиз тартибга салбий таъсир кўрсатиши мумкинлигидан огоҳлантирган. Шундан сўнг Ўзбекистон ТИВ фуқароларни хорижда мамлакат обрўсига путур етказувчи ҳаракатлардан тийилишга чақирди. Мазкур воқеалардан кейин эса айрим ўзбекистонликларнинг БААга киришида муаммолар кузатилгани қайд этилган.
