Франция раҳбари Эммануэль Макрон Парижда G7 саммити ўтказишни таклиф қилди, бироқ АҚШ президенти Дональд Трамп мазкур ташаббусни қўллаб-қувватламади. Трамп журналистларга берган интервьюсида Европа сафари доирасида Парижга бориш режаси йўқлигини айтган.
Германия ҳукуматидаги манбаларга кўра, канцлер Фридрих Мерц ҳам Макрон таклиф қилган кунда Парижга бормайди. У Давосдаги Жаҳон иқтисодий форумида иштирок этгач, тўғридан тўғри Брюсселда ўтадиган Европа Иттифоқи саммитига йўл олиши режалаштирилган.
Трамп Truth Social тармоғида Макрон томонидан юборилгани айтилган хабарлар “скриншот”ларини эълон қилди. Уларда Франция президенти Трампни Париждаги G7 учрашувига таклиф қилиб, бир қатор халқаро масалаларни муҳокама қилишни таклиф этган. Бироқ Трамп ушбу таклифга жавоб берган-бермаганини очиқламади.
Қайд этилишича, Дональд Трамп 21 январь куни Давосда бўлиб ўтадиган Жаҳон иқтисодий форумида нутқ сўзлаши кутилмоқда. Фридрих Мерц ҳам у билан Давосда учрашишга умид қилмоқда, аммо бу учрашувнинг бўлиши ҳозирча аниқ эмас.
