Шу муносабат билан электр, иссиқлик ва газ таъминоти барқарорлигини таъминлаш мақсадида қатор тезкор чоралар кўрилмоқда.
Ҳаво ҳароратининг кескин пасайиши кутилаётгани сабаб ёқилғи-энергетика тизими кучайтирилган иш режимига ўтказилди. Бу ҳақда Энергетика вазирлиги хабар берди.
Маълум қилинишича, энергетика объектларида қўшимча техник кўриклар ўтказилиб, ишлаб чиқариш ва етказиб бериш қувватлари совуқ об-ҳаво шароитига мослаштирилган. Масъул хизматлар туну кун иш олиб бормоқда ва эҳтимолий носозликларни тезкор бартараф этишга тайёр ҳолатга келтирилган.
Совуқ кунларда энергия ресурсларига талаб ортиши сабаб айрим ҳудудларда вақтинчалик техник чекловлар бўлиши мумкин. Шу билан бирга, аҳоли ва ижтимоий аҳамиятга эга объектларни барқарор энергия билан таъминлаш устувор вазифа бўлиб қолади.
Фуқаролардан электр энергияси ва табиий газдан оқилона фойдаланиш, иситиш ускуналаридан тежамкорлик билан фойдаланиш ҳамда хавфсизлик қоидаларига қатъий риоя этиш сўралмоқда. Энергия таъминоти бўйича мурожаатлар учун электр энергияси юзасидан 1154, газ таъминоти бўйича эса 1104 ва 104 рақамларига қўнғироқ қилиш мумкин.
