Бирлашган Миллатлар Ташкилоти Хавфсизлик кенгаши бугун, 15 январь куни АҚШ сўровига биноан Эрондаги вазият бўйича йиғилиш ўтказади. Бу ҳақда январь ойида Хавфсизлик кенгашига раислик қилаётган Сомалининг БМТдаги доимий ваколатхонаси маълум қилди.
АҚШ илтимосига кўра, йиғилиш Яқин Шарқдаги вазият кун тартиби доирасида брифинг шаклида ўтказилади. У 2026 йил 15 январь куни Нью-Йорк вақти билан соат 15:00 га белгиланган.
Эронда 2025 йил 28 декабрда миллий валюта курсининг кескин пасайишидан сўнг норозилик намойишлари бошланган. Улар полиция билан тўқнашувлар, маъмурий биноларга ҳужумлар ва интернетга кириш чекловлари билан кечган. АҚШ президенти Дональд Трамп Теҳрон намойишчиларга нисбатан куч ишлатса, Вашингтон аралашишга тайёрлигини билдирган. Эрон олий раҳбари Али Хоманаий эса АҚШни мамлакат ички ишларига аралашмасликка чақирган.
Шунингдек, Эрон Хавфсизлик кенгаши тартибсизликларда АҚШ ва Исроилни айблаган. 13 январь куни Трамп намойишчиларни ҳокимиятни эгаллашга чақириб, Эрон билан барча учрашувлар бекор қилинганини эълон қилган. Россия ТИВ Эронга нисбатан ташқи аралашувни кескин қоралаган.
