Бу кўрсаткич ўтган йилга нисбатан бироз камайган.
Ўзбекистонда 2025 йил давомида содир бўлган йўл-транспорт ҳодисалари оқибатида 2 188 нафар инсон ҳалок бўлди. Бу ҳақда Йўл ҳаракати хавфсизлиги хизмати маълум қилди. Таъкидланишича, мазкур кўрсаткич 2024 йилда қайд этилган 2 199 нафарга нисбатан камроқ.
Шунингдек, ЙТҲлар сабаб 2025 йилда 8 901 киши турли даражада тан жароҳати олган. Бу ҳам ўтган йилги (8 931 нафар) кўрсаткичдан паст.
Мутахассислар таҳлилига кўра, сўнгги беш йилда аҳоли ва транспорт воситалари сони сезиларли ошганига қарамасдан, йўл-транспорт ҳодисалари ва улар оқибатидаги ўлим ҳолатларида камайиш динамикаси сақланиб қолмоқда. Хусусан, ҳар 100 минг аҳолига нисбатан ўлим кўрсаткичи 6,9 тадан 5,7 тага тушган.
Болалар хавфсизлигини таъминлашга қаратилган чора-тадбирлар ҳам самара берган: 2025 йилда болалар иштирокидаги ЙТҲлар сони 2024 йилга нисбатан 171 тага, ҳалок бўлган болалар сони эса 36 тага камайган.
Маълумот ўрнида, 2024 йил якунларига кўра, Ўзбекистон МДҲ давлатлари орасида ўлим билан боғлиқ ЙТҲлар кўрсаткичи энг паст бўлган мамлакат сифатида қайд этилган.
