Эронда норозилик намойишлари давомида тахминан 2000 нафарга яқин киши ҳалок бўлган. Бу ҳақда 13 январь куни “Reuters” агентлиги манбаларга таяниб хабар берди.
Нашр маълум қилишича, шахсини ошкор этмасликни сўраган эронлик расмий суҳбат давомида қурбонлар орасида ҳам намойишчилар, ҳам хавфсизлик ходимлари борлигини айтган. Унинг сўзларига кўра, ўлимлар ортида “террорчилар” турган, бироқ аниқ кимлар ҳалок бўлгани очиқланмаган.
Айни пайтда мамлакатда вазият нисбатан барқарорлашган бўлса-да, тўлиқ тинчлик ўрнатилмаган. Иқтисодий қийинчиликлар сабаб келиб чиққан тартибсизликлар сўнгги уч йил ичида Эрон учун энг жиддий ички инқирозга айлангани таъкидланмоқда.
