Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев 13 январь куни бўлиб ўтган Хавфсизлик кенгашининг кенгайтирилган йиғилишида мамлакат ҳарбий хавфсизлиги ва мудофаасини мустаҳкамлаш масалаларига тўхталди.
Йиғилишда замонавий хавф ва таҳдидлар мазмуни ҳамда кўлами жадал ўзгариб бораётгани қайд этилар экан, давлат раҳбари саккиз йил аввал қабул қилинган Мудофаа доктринаси ҳамда 1997 йилда тасдиқланган Миллий хавфсизлик концепциясини қайта кўриб чиқиш вақти келганини таъкидлади.
Маълум қилинишича, янги Мудофаа доктринаси Ўзбекистоннинг ҳеч қайси ҳарбий блокка қўшилмаслик сиёсатига содиқ қолади. Ҳужжатда кўп томонлама дипломатияни давом эттириш, юқори технологияларга асосланган мудофаа стратегиясини шакллантириш, ҳарбий мустақилликни мустаҳкамлаш ва минтақавий барқарорликни таъминлаш устувор йўналишлар сифатида белгиланиши кўзда тутилмоқда.
Президент таъкидлаганидек, янгиланган доктрина армияни технологик жиҳатдан модернизация қилиш ва илғор ҳарбий ечимларни жорий этиш учун мустаҳкам асос бўлиб хизмат қилиши лозим.
