АҚШ президенти Дональд Трамп мамлакатнинг 66 та халқаро ташкилотдаги аъзолигини бекор қилишни назарда тутувчи меморандумни имзолади. Бу ҳақда Оқ уй 7 январь куни Х ижтимоий тармоғидаги саҳифасида маълум қилди.
Қайд этилишича, мазкур ташкилотларнинг 31 таси БМТ шафелигида фаолият юритади, яна 35 таси эса БМТга алоқадор бўлмаган тузилмалардир. Оқ уй баёнотига кўра, ушбу ташкилотлар “АҚШ манфаатларига мос келмайди”.
Рўйхатга Украина Илмий-технологик маркази, Венеция комиссияси, БМТ бош котибининг болаларга нисбатан зўравонлик масалалари бўйича махсус вакили офиси, БМТ Демократия жамғармаси каби тузилмалар ҳам киритилган.
Давлат котиби Марко Рубио баёнотида Трамп маъмурияти бу ташкилотларни “исрофгар, самарасиз, зарарли”, шунингдек, “АҚШ суверенитети ва фаровонлигига таҳдид солувчи” деб баҳолаганини таъкидлади.
