Швейцариянинг машҳур Кран-Монтана курортида жойлашган Le Constellation барида Янги йил кечаси катта ёнғин юз берди. Оқибатда камида 40 киши ҳалок бўлган, 80–115 нафар одам турли даражадаги куйиш жароҳатлари билан шифохоналарга ётқизилган.
Расмий сабаб ҳали эълон қилинмаган бўлса-да, тарқалган фото ва видеоларга кўра, ёнғинга шампань шишаларига маҳкамланган бенгал чироқлари сабаб бўлган бўлиши мумкин. Гувоҳлар шифт тез ёниб кетгани, бинода чиқиш жойлари тор бўлгани ва қисқа вақт ичида тиқилинч юзага келганини айтишмоқда.
BBC’га суҳбат берган маҳаллий аҳоли вакиллари одамлар қичқириб, ёрдам сўраб, чиқишга уриниб қолганини, айримлар эса тириклайин ёниб кетганини таъкидлаган. Жабрланганлар Швейцария, Франция, Италия ва Бельгия шифохоналарига етказилган.
Ҳодиса бўйича тергов ишлари олиб борилмоқда. Франция ва Италия расмийлари ҳалок бўлганлар ва жабрланганлар орасида ўз фуқаролари борлигини тасдиқлаган.
