Украина Миллий хавфсизлик ва мудофаа кенгаши котиби Рустем Умеров бошчилигидаги делегация урушни тўхтатиш режасини муҳокама қилиш учун АҚШга боради. Бу ҳақда 18 декабрь куни Axios нашри манбаларга таяниб хабар берди.
Маълумотларга кўра, ҳафтанинг охирида Украина делегацияси Майами шаҳрида АҚШ президенти Доналд Трампнинг махсус вакили Стив Уиткофф ҳамда унинг куёви Жаред Кушнер билан учрашади. Президент Владимир Зеленский ҳам украин делегациясининг АҚШга жўнаб кетганини тасдиқлаган, бироқ унинг аниқ таркибини очиқламаган. Шу билан бирга, музокараларда Европа давлатлари вакиллари ҳам иштирок этиши мумкинлиги айтилган.
Аввалроқ Politico нашри 20–21 декабрь кунлари Майамига Россия делегацияси ҳам келиши кутилаётганини ёзган эди. Унга Россия президентининг махсус вакили Кирилл Дмитриев бошчилик қилади. Россия делегацияси ҳам Уиткофф ва Кушнер билан алоҳида музокаралар ўтказиши режалаштирилган.
Axios манбаларига кўра, ҳозирча АҚШ, Украина ва Россия иштирокида уч томонлама учрашув ўтказилиши кўзда тутилмаган.
Қайд этилишича, 14–15 декабрь кунлари Стив Уиткофф ва Жаред Кушнер Берлинда Украина ҳамда қатор Европа давлатлари вакиллари билан музокаралар ўтказган. Ушбу учрашувлар якунида АҚШ томони уруш якунланган тақдирда Украинага хавфсизлик кафолатлари беришга тайёр эканини билдирган, аммо ҳудудий ён босиш масаласи очиқ қолган.
Шунингдек, декабрь ойи бошида Уиткофф ва Кушнер Москвада Россия президенти Владимир Путин билан ҳам учрашув ўтказган, бироқ музокаралар тафсилотлари ошкор қилинмаган.
