UEFA Германиянинг “Бавария” клубини мухлислар билан боғлиқ тартиббузарликлар сабаб 116 минг евро миқдорида жаримага тортди ҳамда Чемпионлар лигаси доирасидаги келгуси уй учрашуви учун стадионнинг айрим секторларини ёпиш қарорини чиқарди.
Маълум қилинишича, жазо декабрь ойида “Спортинг”га қарши баҳсда мухлислар томонидан жамоат йўлларининг тўсиб қўйилгани ва тартибсизликлар юзага келгани билан боғлиқ. Ушбу ҳолат аввал шартли тарзда баҳоланган бўлса-да, UEFA жазони ижрога қаратишга қарор қилган.
Шу сабабли, 21 январь куни “Union”га қарши бўлиб ўтадиган Чемпионлар лигаси учрашувида “Alyans Arena” стадионининг 111–114-секторлари ёпиқ бўлади. Стадионни қисман ёпиш бўйича қўшимча жазо ҳам белгиланган, бироқ у икки йиллик синов муддати билан вақтинча тўхтатиб турилди.
Бундан ташқари, ноябрь ойида “Arsenal”га қарши сафардаги ўйиндан кейин юзага келган тартибсизликлар учун ҳам “Бавария” жаримага тортилган. UEFA немис клубини оломон орасида тартибсизликлар содир этилгани ва буюмлар улоқтирилгани учун 40 минг евро, спорт тадбирига мос келмайдиган хабарлар тарқатилгани учун эса 30 минг евро жарима билан жазолаган.
