ДХХнинг Сурхондарё вилояти бўйича бошқармаси ва вилоят ИИБ ходимлари ўтказган тезкор тадбирда 1985 йилда туғилган Термиз шаҳри фуқароси “Кобальт” русумли автомобилида 50 кг 978 г гашиш олиб кетаётган вақтда тўхтатиб қолинди. Текширув давомида унинг яшаш уйидан қўшимча 186 г гашиш топилган.
Унинг 1986 йилда туғилган Шеробод туманидаги жиноий шериги ҳам қўлга олинган. Аниқланишича, ушбу наркотик моддалар Афғонистонлик курьерлар орқали айланма йўллардан мамлакатга олиб кирилган ва сотиш режалаштирилган. Дастлабки маълумотларга кўра, қўлга олинганлардан бири илгари наркотик савдоси, иккинчиси эса фирибгарлик учун судланган.
Тошкент шаҳрида ўтказилган бошқа тадбирда эса Учтепада яшовчи, 2000 йилда туғилган шахс “Телеграм” орқали синтетик моддалар савдоси билан шуғулланиб келгани аниқланиб, 225 г “Альфа ПВП” билан қўлга олинди.
Шундан сўнг унинг 2005 йилда туғилган таниши ҳам 2 дона “Регапен” кучли таъсир этувчи дори воситаси билан ушланган. У мазкур дорини Мирзо Улуғбек туманидаги дорихонадан сотиб олганини айтган.
Тадбир давомида дорихонанинг норасмий сотувчиси 14 дона “Регапен”ни 1,2 млн сўмга сотаётган пайтида қўлга олинди. Ёрдамчи омбордан эса ҳужжатсиз сақланаётган 20 200 дона “Габатан”, 823 дона “Регапен”, 100 дона “Галара”, 4 дона “Торгабалин” каби кучли таъсир қилувчи дори воситалари топилди.
Ҳозирда барча шахсларга нисбатан Жиноят кодексининг тегишли моддалари бўйича иш қўзғатилган, уларга “қамоқ” эҳтиёт чораси қўлланган ва тергов ҳаракатлари давом этмоқда.
